21.07.2011 - Sighvatur Jónsson

Gufan komin í loftið á netinu

Þá eru prufuútsendingar hafnar á netinu (mms://media.vortex.is/gufan), útvarpssendirinn fer í loftið í kvöld. Útsendingar hefjast formlega klukkan 8 í fyrramálið, föstudaginn 22. júlí, á tíðninni FM 104,7 í Vestmannaeyjum og nágrenni eins og fyrri ár. Sjá nánar í fréttatilkynningu hér að neðan frá því í fyrra sem er enn góð og gild að öðru leyti :)

FÆRSLUR FRÁ 2010 HÉR AÐ NEÐAN

22.07.2010 - Sighvatur Jónsson

Þá eru prufuútsendingar hafnar á neti og í útvarpi, sjá nánar í meðfylgjandi fréttatilkynningu sem var send út í dag.

Gufan hitar upp fyrir Þjóðhátíð Vestmannaeyja 2010

Útvarpsstöðin Gufan fer aftur í loftið fyrir Þjóðhátíð Vestmannaeyja. Gufan var endurvakin í fyrra í tilefni þess að þá voru 20 ár liðin frá því að stöðin var fyrst starfrækt. Leikurinn verður endurtekinn nú og hefjast útsendingar með formlegum hætti í fyrramálið, föstudaginn 23. júlí, klukkan 9 og standa yfir hátíðina. Gufan hitar upp fyrir þjóðhátíð með tónlist, fréttum og spjalli um allt sem viðkemur hátíðinni.

Prufuútsendingar Gufunnar eru hafnar og er bæði hægt að hlusta á netinu í gegnum http://www.gufan.is og á tíðninni FM 104,7 í Vestmannaeyjum. Útsendingar Gufunnar nást einnig í nýju Landeyjahöfninni.

Hópurinn sem stendur að baki Gufunni er skipaður gömlum reynsluboltum sem tóku þátt í þjóðhátíðarútvarpinu á upphafsárum þess og yngri útvarpsmönnum. Meðal dagskrárgerðarmanna eru Andri Hugo Runólfsson, Bjarni Ólafur Guðmundsson, Geir Reynisson, Gunnar Friðberg Jóhannsson og Sighvatur Jónsson. Hægt er að hafa samband við Gufuna í gegnum tölvupóstinn gufan@gufan.is eða á nýrri Facebook síðu. Þá verður einnig hægt að nota gamla góða símann til að hringja í útsendingarnúmerið 481 3443.

Áhugasömum auglýsendum er bent á að hafa samband við Bjarna Ólaf í síma 896 6818 eða á tölvupóstinn daddi.hem@gmail.com.

Nánari upplýsingar veita Geir Reynisson (858 8868) og Bjarni Ólafur Guðmundsson (896 6818).

FÆRSLUR FRÁ 2009 HÉR AÐ NEÐAN

30.07.2009 - Sighvatur Jónsson

Jón Óskar sat með okkur Geir í morgun og var spjallað um tjöldun, lunda og búninga. Maggi Braga sagði okkur að hann ætti enn nóg af lunda fyrir svanga Eyjamenn. Grímseyingar eru meðal þeirra sem hafa reddað Eyjamönnum um lunda þetta árið nú þegar lítil sem engin lundaveiði hefur verið. Við hringdum líka í Selmu Ragnars í Reykjavík sem var að klára búninga fyrir 13 stráka. Hún segir að gallinn þeirra sé í anda Páls Óskars en annars eru búningarnir leyndarmál sem gestir Þjóðhátíðar sjá fyrst í dalnum á morgun föstudag. Við fengum einmitt Pál Óskar og Kidda Bigfoot í heimsókn og barst talið meðal annars að fjölgun Þjóðhátíðargesta í kjölfar nýrrar Landeyjahafnar. Palli og Kiddi eru báðir þeirrar skoðunar að hækka eigi miðaverð og takmarka fjölda miða sem seldir verða á næsta ári. Hlustaðu á brot úr viðtalinu við Pál Óskar og Kidda Bigfoot.

29.07.2009 - Sighvatur Jónsson

Þjóðhátíðargleðin hefur haldið áfram á Gufunni. Í morgun voru þvílíkir fagnaðarfundir í hljóðverinu þegar Geir, Sighvatur, Fiddi Palli, Jón Óskar og Siggi Óli komu saman á nýjan leik. Myndir frá þessum frábæra morgni og undanförnum dögum á Gufunni má sjá á Facebook síðu Gufunnar. Við héldum áfram að rifja upp gamlar upptökur og sá sögulegi atburður gerðist að Sigurður Óli Hauksson samþykkti að aflétta áralöngu Rick Astley banni á Gufunni þegar hann heyrði Rick Astley syngja við Nirvana lag. Myndbandið við þessa merkilegu samsuðu er á YouTube og má sjá hér að neðan.

28.07.2009 - Sighvatur Jónsson

Vá...þvílík nostalgía í stúdíóinu hjá okkur Geir í morgun. Ég mætti með gamalt segulbandstæki og hrúgu af gömlum spólum. Við fórum yfir nokkur ódauðleg Gufustef frá fyrstu árum stöðvarinnar, rifjuðum upp ýmis brot úr dagskránni og hlógum mikið. Stutt tóndæmi er hið sívinsæla stef Rapp-Gufan þar sem Óskar Ragnars fer fyrir Gufuhópnum við undirleik frá taktföstum trommuheila úr hljómborði Geirs Reynissonar. Fiddi Palli rifjaði upp með okkur „Nei-júh-jætz“ stefin og von er á miklu meiru í fyrramálið þegar Jón Óskar og Siggi Óli mæta til okkar en þeir komu til Eyja með Herjólfi í dag - og ræddu víst lítið annað en gömlu góðu Gufuárin um borð :o)

27.07.2009 - Sighvatur Jónsson

Útsendingar hófust formlega í morgun klukkan níu eftir langar og strangar prufur um helgina. Geir og Sighvatur hófu útsendingar Gufunnar samkvæmt vana með því að spila upphafslag Gufunnar í gegnum árin, Eyjan mín bjarta með Gylfa Ægissyni. Fyrsti dagurinn var nýttur til að spjalla við nokkra af upphafsmönnum Gufunnar jafnt í Eyjum sem og á fastalandinu. Jón Óskar var vakinn á fyrsta degi sumarfrísins í höfuðborginni, Fiddi Palli kíkti í hljóðverið og spjallaði með okkur við Tryggva Má, framkvæmdastjóra Þjóðhátíðarnefndar. Sigg' Óli var á línunni af Íslandinu góða en hann var einmitt að ganga frá lokaritgerð í lögfræðinni og var spenntur að komast í frí til Eyja. Selma búningahönnuður sagði okkur af Þjóðhátíðarbúningum sem hún er að gera fyrir 13 spræka stráka, allt voða mikið leyndó þó ennþá :) Óskar Ragnarsson, læknir frá Svíþjóð, eyddi með okkur hluta úr degi við upprifjun í tali og tónum. Ljómandi skemmtilegur upphafsdagur og mikill stemmning í hlustendum sem hringdu, sendu tölvupóst og hlusta jafnt í útvarpi sem og á netinu - nei, jú, jætz (eins og segir í stefinu góða :o)

24.07.2009 - Sighvatur Jónsson

Hljóðverið er að taka sig mynd en við munum senda út frá nýrri aðstöðu Félagsheimilisins á Boðaslóð þar sem áður var leikskólinn Rauðagerði. Ekki náðist að klára að tengja dagskrárlínur frá hljóðverinu að sendinum í dag en hann er staðsettur í Bæjarleikhúsinu á Heiðarvegi. Sú vinna verður kláruð á morgun laugardag og þá getum við farið að spila fleiri lög en þau sem eru á hálftíma kynningunni sem hefur gengið stanslaust frá því í gærkvöldi á FM 104,7 :-) Næsta skref verður svo netstraumurinn sem verður kominn í gagnið í síðasta lagi á mánudaginn.

Gufan FM 104,7 er Þjóðhátíðarútvarp Vestmannaeyja - Sighvatur Jónsson

Gufan fer aftur í loftið fyrir Þjóðhátíðina 2009 í tilefni þess að 20 ár eru liðin frá fyrstu útsendingunni árið 1989. Við hvetjum alla sem hafa einhvern tíma komið að Gufunni að láta vita af sér. Við byrjum helgina fyrir Þjóðhátíð...láttu það berast :-)

Geir Reynisson - 858 8868
Sighvatur Jónsson - 845 8033

Viltu auglýsa eða vera með? Smelltu hér til að senda Gufunni tölvupóst
Smelltu hér til að skoða Fésbókarsíðu Gufunnar (Gufan á Facebook)











Gufan.is er í eigu Sigva Margmiðlunar